食物及衞生局副局長梁卓偉（Gabriel）在豬流感疫情上成日出嚟手指指，原來佢本身係一名業餘指揮家。卓妮尋晚就有機會喺香港兒童交響樂團歸來音樂會上欣賞到Gabriel嘅風采，佢帶領一眾青少年在高低起伏嘅音樂旋律上穿梭，七情上面，一舉手一投足都叫做有啲功架。
譚志源畀面撐場
歸來音樂會尋晚喺中環大會堂只演一場，由Gabriel嘅恩師、葉氏兒童合唱團創辦人葉惠康任音樂總監，Gabriel擔任榮譽客席指揮，兩師徒合力將樂團演出推上高峰，唔少Gabriel嘅官場好友都有去捧場，其中一個就係啱啱紮職做特首辦主任嘅譚志源（Raymond）帶埋太太去撐場。
音樂會完結後，Raymond兩公婆仲走到後台探班，大讚葉惠康及Gabriel兩師徒表演出色。
其實Gabriel啱啱放咗兩星期大假，帶住香港兒童交響樂團到美加巡迴演出五場音樂會，進行慈善籌款，一直未停過。Gabriel四歲已學習鋼琴及指揮，好有音樂天分，雖然他在大學選修醫科，但沒有放棄音樂，讀醫之餘副修音樂，取得音樂碩士資格，至今除了義務擔任葉氏兒童合唱團導師外，亦為香港兒童交響樂團任義務副指揮。
唔肯為自己打分
既然Gabriel音樂造詣咁高，「取醫棄樂」或「取官棄樂」會否太可惜呢？他說：「唔係嘅，音樂係興趣。」講到做官，佢畀自己幾多分呢？他笑說：「幫自己打分沒意思，要等市民畀分；我任期到二○一二年，希望做好眼前嘅嘢！」
卓妮