上碗窰乃明清時期陶瓷生產重地，現存包括礦坑、礦洞、作坊等完整遺址，亦有大量青花瓷器，現時分別散於地面及埋於地下的破碗均極具考古價值。不過，有村民指古蹟辦自九五及九九年發掘後，多年來一直對文物置諸不理，保育只是「得把口」，「講就講到好珍貴，但事實就冇人理，啲遺址又唔圍住佢，日日畀人係咁亂行亂踩，乜嘢古物都爛晒啦！」

碗窰遺址未有任何保護。

古蹟辦在上碗窰村內興建的博物館至今仍開放無期，只有蛛網塵封。

村民擅取「攝」枱腳

事實上，按記者觀察所得，上碗窰村的考古範圍不但未有圍封，被指極具考古價值的「寶物」，包括大量青花瓷器竟四散村內，與被棄置的破碗破碟無異。查證期間，記者更發現有個別居民擅自拿取「古物」墊花盆甚至「攝」枱腳。

香港歷史及文化古蹟專家黃棣才直指問題出於原址保留政策，令碗窰備受破壞，「話就話原址保留，但佢（古蹟辦）挖完又唔理，係咁意堆番埋根本唔係最好嘅處理！」

黃指挖掘古物會影響環境，令古物需重新適應，有機會面對侵蝕，認為古蹟辦應在原址保育，「如果真係咁珍貴同有價值，可以加圍欄或者加個玻璃罩，呢啲工程又簡單又平，仲可以等人了解歷史！」

至於有村民或遊客擅取古物一事，黃則認為與市民未能獲取訊息有關，「亂執呢啲古物係犯法，但香港有幾多人知？」黃建議古蹟辦加強宣傳並向市民灌輸正確保育知識。

有居民將較完整的陶器檢拾後留為「私用」，用來「攝」枱腳或當花盆碟。	古蹟辦所指的「寶物」被居民放在屋外當作石頭使用，毫無保育可言。	古蹟辦所選用的原址保留方法，被批評未能發揮保育功效，令珍貴古蹟及古物被糟蹋。

議員批評無心保育

「我都去過碗窰幾次，感覺就好似爛溶溶咁！」立法會民政事務委員會委員陳克勤批評古蹟辦無心做好保育工作，古蹟辦雖有保育政策，惜並未實行，「既然有歷史價值，可以起好啲設施或者博物館，而唔係由啲古蹟風吹雨打，畀人亂踩亂拎！」

古蹟辦發言人表示，碗窰村內埋於地下及散布地面的破碗，乃明清至民國時期被棄置的瓷器製成品，具有考古及科學研究價值。該處已按顧問公司建議，以最低程度的干預（原址保留）保育有關古物。

發言人又稱，按《古物古蹟條例》，凡未獲當局發牌而發掘及搜尋古物者均屬違法，一經定罪可被判罰五千元及監禁六個月。

記者李世華