呢嗱，曾經因不滿康文署管理亂七八糟而上街遊行嘅康樂事務職員總工會，再次炮轟署方漠視員工安全及健康，一口氣數出五宗罪：

第一宗罪：係人都知香港嘅蚊患有幾嚴重㗎啦，康文署員工唔噴蚊怕水出去戶外工作，隨時會畀蚊針到豬頭咁。不過原來唔噴又死，噴又死，康文署為前線員工提供嘅蚊怕水，有員工試過用咗之後頭暈兼出紅疹。

鬼咩，原來呢隻蚊怕水含有一種DEET避蚊胺成分，有研究發現，用得多有機會令使用者中毒，但奇怪嘅係康文署打死唔肯換隻不含呢種物質嘅蚊怕水，唔通想員工慢性中毒？

第二宗罪：政府成日叫市民喺大熱天時去戶外活動時，最好着淺色衫褲。但佢哋有口話人冇口話自己，康文署一直都冇提供適當防曬衣物及用品畀前線員工使用。你知啦，香港嘅夏天閒閒地三十幾度，員工每日要着深色以及唔透氣嘅衣服開工，容乜易中暑暈低！

第三、四、五宗罪，分別係康文署冇向前線修樹員工提供手套及護眼罩等足夠安全裝備；冇為沙灘工作嘅員工提供安全措施，令佢哋喺搬運重型工具時造成勞損；泳池工作嘅員工好易因長期吸入氯氣而感刺鼻或喉嚨不適。

事實上，工會已經一而再、再而三向管理層反映，仲兩度去信勞工及福利局投訴，始終冇人理會佢哋嘅訴求。而康文署發言人仲好意思話一向重視員工安全，仲拋個波畀勞工處，話如果勞工處巡視時發現有違職安健條例，自然會要求跟進㗎啦。

喂，唔好話有冇官官相護成分啦，試想想身上噴滿DEET避蚊胺、周圍瀰漫住氯氣、隨時有樹幹會跌落嚟、烈日當空兜頭暴曬，咁嘅環境，仲危險過伊拉克戰場，畀着你係勞工處官員，都有咁遠避咁遠啦，巡乜鬼視呀！

話時話，要數康文署嘅罪狀，何止五宗咁少吖。去年之嘛，就有一個十九歲港大女生喺赤柱畀樹壓死，成街都係危樹枯木，但當時嘅康文署署長周達明一於好少理，劑劑都話檢查過冇問題。唉，冇問題都壓死人，如果有問題咪死得人多！

最離譜嘅係，周達明孭到周身都係鑊，竟然可以升官做發展局常秘，臨升前仲要衰多單，畀本報踢爆該署遺失大批孫中山先生珍貴文物，可見佢絕對係港府賞惡罰善嘅最佳人辦，愈孭鑊愈快樂！

所以嗰位即將接任康文署署長嘅馮程淑儀，唔使怕要孭鑊㗎，只要學足周達明咁渾渾噩噩、得過且過，等到畀人數足五百宗罪，到時唔止常秘，可能連司長都有得做呀！