電腦節人流愈來愈多，好多市民都慳住個荷包去掃平貨，就連貴為上市公司主席嘅資訊科技界立法會議員譚偉豪（Samson），都湊熱鬧在電腦節揀番部微型筆記型電腦（netbook）。Samson現時已有四部電腦，分別放置於立法會、公司辦公室及座駕，如果再買一部即係總共有五部，究竟要咁多部電腦做乜呢？
Samson話，每度地方放置一部電腦隨時候命，方便有需要時一定有電腦用喎，可能呢啲就係有錢人用電腦嘅方法。Samson貴為資訊科技界代表，走在科技最前線，netbook推出初期已經率先買咗一部試用，但後來嫌棄部機個螢幕太細，決定在今年電腦節買過一部，咁耐累積不少買機經驗，買買吓已變成專家。
Samson教路，買netbook最緊要電池嘅續航能力，最起碼要用到四至五小時，如果唔係帶出街成日無電就好唔掂。至於價錢方面，Samson就話五千蚊左右就最好，正所謂平嘢冇好，售價太平都唔係太信得過喎！