家有兩女初長成，做爸爸嘅心情往往都好複雜，一來驚個女個性太強或太過專注事業而冇人吼，到嫁得出又驚佢嫁錯郎同自己冇咗個女，作為兩女之父嘅商務及經濟發展局副局長蘇錦樑（阿Greg），就似乎唔多擔心呢啲問題，搶先幫囡囡睇定婚紗，好似好睇得開咁。睇吓佢兩個寶貝女真係出嫁時，佢會唔會唔捨得吖喇？
阿Greg早前去咗英國出席囝囝嘅大學畢業禮，之後仲坐郵輪歐遊慶祝，到近日先至返港重新開工。佢尋日出席城市青年商會舉行嘅「創意創業大賞」頒獎禮，對其中一個婚紗設計嘅單位特別感興趣，停低睇咗好耐先肯走。問佢係咪想同太太再影過婚紗相，佢就話自己用唔着，不過可以幫兩個囡囡留意吓喎。阿Greg細女依家仲讀緊大學，大女亦只係畢業咗兩三年，咁快就紅鸞星動？都唔知佢講真定講笑。
談及自己有乜發揮創意嘅經驗，阿Greg話佢十幾年前做律師行時，法律界仲未流行用電腦，九成九資料都係手寫處理，非常費時失事，佢自己玩開電腦，就自創咗一套電腦程式畀公司應用，效果當然係好好喇！