英聯邦議會聯合會英國分會最近誠邀兩名立法會議員，參加十一月中喺倫敦、布魯塞爾同愛丁堡舉行嘅國際議會管治研討會。會議內容包括實地考察英國上下議院、歐盟議會同蘇格蘭地方議會嘅運作，探討包括地方行政、政黨運作、政府管治、執政黨及反對黨角色、國際合作及區域整合、以至種族、滅貧、國際貿易、氣候變化及維持世界和平等議題，範圍相當廣泛且有國際視野，絕對唔係純粹飲飲食食、握吓手影吓相嘅旅遊觀光考察團。

得陳茂波一個參加

雖然今次英聯邦議會答應承擔兩名參加者喺當地嘅交通同食宿開支，立法會又會畀埋議員由香港飛去倫敦同由愛丁堡飛番香港嘅機票錢，換言之，基本上完全免費，加上行程有咁多嘢睇，理應會有好多人爭報團。點知到上周二晚截止，都只得會計界陳茂波、保險界陳健波同金融服務界詹培忠三名獨立功能組別議員報咗名。最搞笑嘅係，原來陳健波同詹培忠都係因為手民之誤而報錯名，真正想去嘅只得阿Paul Chan 一個，即係仲有一個名額冇人吼。

我哋問來問去不少議員都對呢個行程耍手擰頭，好不容易才找到一個都有啲興趣問津嘅議員，佢就係陳淑莊，原來佢最初以為會有好多人報名，但由於佢喺過去一年多內，已先後應法國、英國、日本同澳洲嘅不同機構邀請到當地考察，遲啲又會跟立法會海濱規劃小組出訪美加，今次先至割愛冇報到名。如果依家有空位剩，佢都會認真考慮重新報名同陳茂波一齊參加研討會，以免畀其他英聯邦國家覺得香港啲議員冇國際視野同唔畀面喎。今次立法會出團竟然搞到要拉伕上陣，真係失禮。