本文重點
卓妮日前在香港會所外遇到前立法會會計界議員李家祥（Eric）夫婦，傾開先知原來佢哋啱啱去完意大利旅行，玩足十三日，唔怪得佢哋睇落咁精神爽利啦！Eric話今次旅行最特別係自駕遊，揸住架車去勻羅馬、梵蒂岡、佛羅倫斯及威尼斯，十日足足揸咗二千公里，每日平均二百公里，最遠程係由中部開上東北部威尼斯。
佳餚美酒大飽口福
Eric今次旅程過足癮，唔係講揸車癮，而係過足口癮。Eric兩公婆歎盡意大利美食，他點名大讚佛羅倫斯嘅芝士分量十足，烤羊肉又好味，而意大利出產嘅生果及蔬菜又特別新鮮，入口分外甘甜，最啱就係做沙律，最後不得不提就係Eric最鍾意嘅紅酒和白酒，當地有好多選擇，美酒配佳餚，梗係好滿足喇。
山長水遠去到意大利，唔少得遊覽當地名勝古蹟，Eric特登到訪咗梵蒂岡，話好值得去。去旅行唔少得購物，問李太在意大利呢個時裝之都有無收穫？李太就含笑搖頭，相信掃咗唔少戰利品。Eric就細細聲透露，回程多咗兩個行李箱，總之就係滿載而歸喇。
卓妮