本文重點
觀塘區議會主席陳振彬（Bunny）自出任青年事務委員會主席後，公務較以前更加繁重，一方面跟進觀塘區嘅抗毒工作，而且又要着手籌辦位於鰂魚涌嘅德育培訓中心，做到無時停。不過，Bunny一向好着重家庭，特別係親子溝通，所以就算幾忙都好，早排都抽時間同太太帶埋兩個囝囝去泰國蘇梅島旅遊，享受親子樂。
暢玩水上活動
被喻為泰國三大島之一嘅蘇梅島，係港人熱愛嘅消暑度假勝地，酒店又多又靚，Bunny一家就入住咗Napasai度假村，揀選咗私隱度極高嘅Villa（別墅）。Bunny話，四日旅程都係玩水上活動，享受陽光與海灘，包括划獨木舟，同囝囝玩浮潛睇魚，一齊整散啲飯糰餵魚，一次過有幾百條魚仔游埋嚟爭食，大仔焯晞和細仔焯煦都玩得好開心。
Bunny係蘇梅島嘅常客，貪地點夠方便，通常每次旅程都係一星期，但今次遇着要出席活動，所以被迫將行程縮短到四日，扣除頭尾兩日乘飛機，實質只玩兩日。究竟乜嘢活動要Bunny嘅假期讓路呢？咪又係青少年抗毒活動囉！Bunny認為，抗毒嘅短期措施係靠警方加強掃毒，中期措施則是校本驗毒，長遠就要家長多啲關心子女。
卓妮