18/08/2009

播放本新聞相關短片

政情:黎以德履新蕭規曹隨

新任運輸署署長黎以德尋日履新,俗語有云:新官上任三把火,今次佢由工業貿易署平調過檔,傳聞係升官前奏,難怪尋日佢發新聞稿談履新時蕭規曹隨為上,拍心口話要秉承運輸署「路路暢通」嘅服務宣言。

黎以德尋日先畀頂高帽運輸署,表揚署方致力提供世界上最好嘅交通運輸系統,唔單止安全、高效、環保,仲得到乘客嘅讚譽。繼而話會同署方同事合作,搞好運輸署嘅工作,最後佢再補充話,署方會全心全意做好策劃、管理同監管嘅角色,保持香港「路路暢通」。

成篇履新聲明咁四平八穩,唔知係咪同佢有機會升職嘅傳聞有關,事關黎以德嘅上司、運輸及房屋局常任秘書長何宣威明年就退休,盛傳升正首長級第六級(D6)嘅黎以德有機會更上層樓,接替何宣威做常秘。不過工貿署同運輸署嘅工作範疇截然不同,前者面向商界,後者面對普羅市民,稍有差池好易孭鑊;難怪黎以德發個聲明都四平八穩,冇乜驚喜!