大角咀一商場內設兩間補習社，租用四個相連舖位，每日下午二時後便有小學生陸續前往參加補習班。家長陳女士指，早前獲悉有教育局職員突擊巡查，才驚悉兒子入讀無牌補習社，「接放學嗰陣，囝囝一見到我就話補補吓習有班人走入去，叫佢哋伏低影相，又派通告，原來係政府通知家長話呢間補習社無牌！」

租四課室交換學生

一名在該補習社任教的導師稱，負責人雖被揭發無牌經營，但仍擺出一副「未驚過」模樣，「教育局叫我哋（職員）唔好再喺呢間補習社做，唔係會罰錢！但佢哋走咗之後，老細話教育局啲人冇咁快返轉頭巡，叫我哋放心做！」但導師為免受牽連，日前已自行離職。

記者分別向上述補習社查詢收生情況時，其中一間補習社男負責人即不斷力銷，聲稱師資全達中五以上程度，亦可選擇不同時段補習，「小學補習班一律一千五百元，平日補個半鐘，星期六補足三個鐘，好抵！」記者查詢牌照問題時，對方即小心翼翼地說：「每班唔會超過七個學生，唔使攞牌！」不過，就記者觀察所得，四個課室不時「交換」學生，其中一間課室換人後仍最少有十名學生，另兩個課室則分別有八名及九名學生在補習。

教育局發言人證實，上述兩間補習社未經註冊開辦教育課程，違反《教育條例》，該局會跟進及考慮檢控違例者。發言人又說，在同一天內向二十人或以上、同一時間向八人或以上提供教育課程，即須註冊或臨時註冊為學校。最近三年，該局共接獲八百宗涉嫌營辦未經註冊學校的投訴。

走法律罅化整為零

「啲補習社最叻走法律罅，化整為零，要學生走鬼補習，又唔知有冇消防設備，教育局要加緊巡查同監管！」油尖旺區家長教師會聯會會長劉李偲嫣指教育局欠監管，令無牌補習社湧現。

立法會教育事務委員會委員梁耀忠認為，補習社須符合消防安全等要求始獲發牌，否則學生的安全將備受威脅，「但教育局成日有人投訴先跟進，唔會主動巡查，實際情況可能比依家嘅投訴數字嚴重！」

■記者 吳琰玲