民主黨立法會議員李華明一直關注食物安全、衞生同旅遊事務，連放假去內地旅遊都不忘工作。上星期佢同太太去遼寧大連玩，途中都專程坐車去咗一個大型供港雞場，話香港有一半雪雞都係呢度出產。佢大讚雞場管理得相當衞生同完善，由生產雞苗、將啲雞養大，以至屠宰、雪藏同包裝出口，都係一條龍包辦，香港人絕對可以放心食用，就算以後冇晒活雞食都冇有怕，簡直幫政府推銷埋中央屠宰政策。
大連出名盛產海鮮，幾十蚊就有大大隻鮑魚，肥仔明幾乎日日都有食，但對其他海鮮就冇乜興趣，原因唔係唔衞生，而係對當地烹調海鮮嘅方法不敢恭維，例如不論煮乜嘢貝殼類海鮮，都淨係識得用鹽水烚，好似佢咁嘴刁嘅香港人食唔慣，仲話同佢選區嘅鯉魚門海鮮檔完全冇得揮。
香港嘅海洋公園現正進行擴建，肥仔明亦去咗號稱全國最大嘅大連海洋公園考察，佢話嗰度地方就夠晒大，海獅、海狗、北極熊應有盡有，但管理同衞生就同香港差幾皮，大門口居然有燒魷魚同腸仔賣，啲旅客可以邊食邊睇邊亂拋垃圾，令佢大開眼界，話去過一次就夠晒！