政府尋日刊憲，宣布新一屆嘅航空發展諮詢委員會成員，由下月一日生效，任期兩年。喺新一屆名單入面，旅發局主席田北俊、滙豐銀行執行董事王冬勝、太古（中國）有限公司主席陳南祿等十四名成員繼續獲得委任，只有「公職王」鄭慕智需要起身。而新增嘅委員就有三名，包括香港總商會主席包立賢、前應用科技院主席黃子欣，同埋香港空運貨站有限公司常務董事黃思豪。
記得七月初嗰陣，政府宣布由鄭慕智接替高院法官彭鍵基出任離職公務員就業申請諮詢委員會主席，當時已引來詬病，話鄭慕智擔任嘅公職太多，違反政府訂立嘅「六六原則」，當時佢回應話已辭去航諮會同策發會兩項公職，今次可以話係正式宣布。
至於新加入委員會嘅三位委員以黃子欣最為矚目。黃子欣做應科院主席時，就曾經因為用公帑睇風水被審計署同立法會批評，佢仲係香港首間廉價航空公司、前甘泉航空嘅董事之一，甘泉航空去年四月仲以清盤收場，不過黃子欣尋日照樣獲委任入航諮會，莫非甘泉嘅經驗有值得借鏡之處？