呢排教育局中人畀校園驗毒試行計劃搞到頭都大埋，偏偏呢個時候局長孫明揚去咗放大假，結果兩位政治新丁、副局長陳維安（Kenneth）同政治助理楊哲安（Jeremy）都要出嚟撲火，正好考驗佢哋嘅政治智慧，當係考牌。Jeremy就奉命「單刀赴會」去見班反校園驗毒嘅學生團體，睇吓佢哋搞邊科嘞！
早幾日陳維安喺電台表示願意先行驗毒，有人覺得佢敢於迎戰，亦有學生潑冷水話佢擺姿態，Jeremy今次就採取「投其所好」策略。佢話依家Facebook有學生發起反驗毒群組，已有幾百人參加，佢喺Facebook搵到提出「先簽名，後罷課」嘅罷課Group發起人WY Law，仲成功約對方出嚟見面，佢又約緊其他三組表達過反對意見嘅團體出嚟見面。前排高官上網事件鬧到㷫合合，Jeremy都要申報一吓，話自己上Facebook係喺辦公室以外做，目的都係為工作喎。
Jeremy仲話，除咗透過Facebook同班學生拉近距離，自己都會多啲了解佢哋嘅諗法，盡量多聽意見。佢仲先賣口乖讚學生提出嘅部分意見同憂慮非常合理添。究竟Jeremy今次過唔過到關，大家不妨拭目以待。