其實智慧大師揀定心水接班人，乃早有部署。年屆七十五歲嘅佢，三年前已開到口話「心內覺得要退休」，去年身體終於亮紅燈，一場中風令佢一度病危。自此佢深居簡出，偶爾出席公開場合亦要篤住支拐杖，健康狀況備受外界關注。

寶蓮寺亦唔係無後着，兩位首座和尚宏通法師及健釗法師，早已成為寺內兩頭馬車，被視為智慧大師接班人大熱。宏通專注佛學研究；健釗則主理行政事宜，智慧大師三年前接受傳媒訪問時，曾明言屬意由同門兄弟健釗法師擔任下任方丈，佢仲話當年，提及同健釗喺四十三年前一同出家時認識：「我哋一同生活，從未有爭吵過，健釗係我最合拍嘅書友，我今日能成為第一把交椅，全靠佢扶助我。」

不過世事無絕對，智慧大師近年反而器重宏通。話說尋日以身體疲累為由缺席植樹儀式嘅智慧大師，喺活動結束後突然露面，其時宏通正喺寺內大禮堂招呼緊金民豪食齋宴，智慧大師即時細細聲介紹宏通畀金老闆認識：「呢位係我哋嘅未來方丈。」言下之意，下屆寶蓮寺揸Fit人係邊位，大家心中有數嘞。

嚴肅回應　語帶玄機

難怪去年離島舉行昂坪競步慈善賽，宏通已代表智慧大師出席活動，尋日「頂更」植樹，地位更不言而喻。智慧大師事後解釋失場原因，話因為大病後講嘢唔及以前好，所以冇主禮。不過佢頭腦依然清醒，問佢係咪交棒畀宏通，智慧大師好嚴肅咁話：「呢個要由董事局決定，唔係我話事，但宏通及健釗肯定係最後兩大人選。」

問到幾時交棒，智慧大師冇正面回應，不過佢語帶玄機話：「寶蓮寺有我喺處同無我喺處都係一樣啫，年尾我會同你哋講嘢嘞！」莫非意味着智慧大師將於年尾宣布退位？