Brendon十一歲已經立志做醫生，十七歲遠赴英國讀大學，阿Greg同卓妮講，眼見囝囝大學畢業，又搵到自己鍾意嘅職業，深感開心同欣慰。Brendon在英國讀書五年間，每年回港探望家人之餘，都會同父親一齊參加有意義活動，好似前年回港期間曾為香港盲人輔導會籌款，Brendon在盲人樂隊伴奏下獻唱行善。

阿Greg放兩星期大假，第一個星期參加囝囝畢業禮，第二個星期就飛去羅馬參加郵輪假期，暢遊地中海多個國家，包括希臘、土耳其、意大利西西里島等，今次假期特別開心，一來囝囝大學畢業，二來真正感覺放緊長假，因為自去年六月出任副局長以來，只係今年農曆新年放過一次假。

享受郵輪假期乘機偷師

但阿Greg放假之餘不忘工作，仲趁今次郵輪假期乘機偷師，為正在籌備興建嘅香港郵輪碼頭度吓橋，好似係咪可以在旅客落船地點表演香港傳統藝術，設立傳統手工藝店舖咁，增加郵輪碼頭附近嘅配套設施。阿Greg話，郵輪旅客消費力好強，一落船就瘋狂購物，就連平時外遊唔購物嘅佢，都在土耳其買了一幅手織羊毛地氈回家，聞說都唔平，具體價錢佢就唔想講喇。

卓妮