既然人類擁有從錯誤中學習嘅能力，照咁講，舊年發生旺角嘉禾大廈五級大火之後，非常之咁失敗嘅特區政府，應該變得非常之咁成功，事實係點呢？呢壇嘢講起上嚟的確古怪，嘉禾火災唔經唔覺過咗一年嘞，竟然乜都冇改善，法例漏洞仍然存在，巡查監管形同虛設，發牌部門各自為政。失敗做唔到阿媽，生唔到仔仔成功。或者可以咁講，特區政府嘅失敗係不育嘅，如果唔想繼續冇仔生，有必要考慮人工受孕。

大家記憶猶新，嘉禾大廈無情火災令到消防隊目蕭永方以及消防員陳兆龍壯烈殉職，人人都希望歷史唔好重演。本報記者巡視過區內多間娛樂場所，並向負責發卡拉ＯＫ牌照嘅食物環境衞生署以及民政事務總署，同埋負責防火安全嘅消防處，查詢安全情況，你估得到乜嘢回應吖嗱？得人驚咯，原來喺嘉禾大廈附近經營嘅夜總會，攞嘅只係小食牌，並唔係卡拉ＯＫ牌。

點解淨係攞小食牌都可以照常營業呢？呢個就係法例漏洞嘞，根據現行《卡拉ＯＫ場所條例》，場所之中只要涉及卡拉ＯＫ活動嘅面積冇超過三成，就可以豁免攞牌。

假如你係蠱蠱惑惑嘅東主，當你發覺食環署出動巡查，你梗係夾手夾腳收起卡拉ＯＫ設施啦，等署方官員係咁意巡過之後，即刻好似變形金剛咁樣恢復原狀繼續唱歌跳舞查撐篤撐。

法例漏洞之外，仲有消防漏洞。後樓梯擺滿雜物，消防喉系統損壞，逃生門唔係鎖住，就係有雜物頂住，一旦再次發生火災，危機重重，陷阱處處。

嘉禾大火一周年，漏洞未堵塞，問題未解決，難怪區議員狠批政府草菅人命。喂，有冇可能統一發牌，唔好畀花多眼亂嘅政府部門各自為政呢？有冇可能透過統一發牌提高安全系數？都話咗啦，特區政府嘅失敗係冇仔生嘅，大家幫襯旺角卡拉ＯＫ嘅時候，記住執生，最好自備氧氣罩。

講到呢度，功夫茶有少少心酸，殉職嘅蕭永方同埋陳兆龍，安葬浩園都唔短時間嘞，調查居然仲係拖拖拉拉，死因至今未有定論。消防處發言人話喎，嘉禾大火調查即將完成，之後會將報告交畀警方，然後轉送死因庭，再決定係唔係展開死因研訊。唔知大家點諗，功夫茶就覺得，大老爺，一年喇，係咪要兩位救人英雄死得不明不白呀？

總而言之，嘉禾大火一周年，危機依舊恨綿綿，真失敗！