工聯由會長鄭耀棠領軍嘅選舉機器政務委員會開過兩次會之後，對二○一一年區議會選舉定出初步策略，就係嚟一招撒豆成兵，邊個選區有泛民參選，而又無建制派迎戰，工聯就會派人出征，一嚟當係練兵，二嚟為翌年立法會選舉插樁腳，乘機開拓工聯嘅傳統弱區，好似九龍東同港島咁，呢招一箭雙雕都算夠絕。棠哥講過，工聯嘅人以後喺立法會選舉唔再為友好政黨抬轎，而係要坐轎入議會，睇嚟唔係講笑，左中右政黨準備摺起衫袖應戰啦。

講開工聯嘅二○一二年立法會選舉部署，有傳聞指新任理事長吳秋北可能出戰九龍西或者九龍東，消息話，未有咁快決定，起碼都要睇埋九龍西嘅選區範圍劃界係咪會擴大，令議席由四席變五席，依家推測只係浪費腦力。