四十三位曾接受心、肺、肝、腎及骨髓移植嘅港人月底將出戰澳洲黃金海岸，參加世界移植人士運動會，尋日一班健兒齊集伊利沙伯醫院舉行誓師大會，請嚟全國人大常委范徐麗泰及行會成員梁智鴻（金刀梁）做嘉賓。
范太將左腎捐畀愛女范凌華，已經係十四年前嘅事，金刀梁尋日致辭時不忘讚范太係器官捐贈嘅佼佼者，夠勇喎。查實人稱泌尿科外科聖手嘅金刀梁都唔弱，佢自爆四十年前全港首宗器官移植手術，就係由佢操刀，當年嘅病人係做腎臟移植，金刀梁至今仍記憶猶新。
同場仲有醫管局行政總裁蘇利民，蘇總裁挺身撐場，點知畀大會主持揪後腳，話說兩年前香港首次派出移植康復者參加喺曼谷舉行嘅世界移植運動會，奪得佳績，蘇總裁曾拍心口承諾兩年後帶隊去澳洲參賽，因為當地係佢家鄉。可惜蘇總裁最終帶隊不成，佢深感guilty（內疚）之餘，不忘補飛，狂讚比賽場地嘅黃金海岸風景優美，叫參賽健兒咪掛住欣賞美景，連比賽都唔記得參加。