香港股市受惠環球熱錢水浸，早前有趁低位入貨嘅股民唔少都賺到笑，而金融海嘯後奉守「Cash is King」原則嘅自由黨前主席田北俊，就因為小心為上，最終錯過入市機會，連田少自己都自嘲走雞。
上年金融海嘯爆發之後，田少坦言自己炒燶Accumulator（累計認購期權），指身邊嘅有錢朋友「個個都有買」，海嘯過後，田少對經濟狀況態度審慎，又親眼目睹歐美各地都窮到燶，認為有排都未復甦，不過盲目嘅散戶唔理理性嘅分析，個市轉眼間又升番二、三千點，今次復仇嘅機會，田少錯過咗。
不過田少一啲都唔着緊，原因係樓市補番數有凸，田少單靠位於九龍灣、樓高四十層嘅自置商廈Manhattan Place，已經執番唔少。田少話，依家銀行信貸利息咁低，就算租金平咗，成幢大廈出租率只有大約七成，但一來一回每月利息支出都慳番唔少，淨係收租都印印腳，使乜憂唧？
至於普羅市民如果有閒錢，係咪買樓投資有着數？田少就話山頂豪宅同天水圍有好大分別，係買都要小心啲。