立法會秘書長吳文華（Pauline）上任短短一年，期間已經經歷咗議員掟蕉掃枱、新大樓內部設計定稿、首次有議員喺立法會大樓內跌傷、公眾席發生首宗血案、以及梁展文事件專責委員會畀人司法覆核等多項歷史性事件，令佢做到無停手，少咗時間拍拖湊孫。不過出名係工作狂嘅Pauline就話，過去一年佢過得好充實好開心，唯一係開立法會大會時唔着得太高踭嘅鞋，令一向貪靚嘅佢有啲啲不滿。
議員喺議事堂掟蕉掃枱，Pauline要經常站喺最前線負責阻截議員衝向官員席，Pauline本人就話未驚過，因為嗰幾位成日搞搞震嘅議員其實都好有男士風度，絕對唔會對一名弱質女流動粗，有時仲會事先向佢通水，講定下次搞啲乜，等佢預早準備。唯一影響到佢嘅，係為免必要時要衝出去維持議會秩序時發生意外，Pauline開立法會大會要戒着太高踭嘅鞋。仲有少少唔開心，就係開夜車趕文件幾乎通宵，食零食多咗，令佢肥咗唔少。