方文雄行情看漲

IQ博士上年連任立法會中總代表後表明，二○一二年夠鐘退下火線，換言之，商界（二）席位幾乎肯定會換人。中總芸芸領導層中，邊個最有潛力接棒？現年五十二歲嘅方文雄，係老牌地產商協成行第三代接班人，身家估計有二、三十億元，兩年前轉趨高調，身影活躍於親中酒會，○七年底一度傳佢有意參選港區人大，依家喺中總擔任副會長，論資排輩，佢夠晒資格接IQ博士棒，而且，會內中人都指佢作風沉實，令佢行情看漲。

另一位有機會接IQ博士棒嘅人係今年四十六歲嘅黃英豪，黃係中總會董、全國政協委員，出身於法律世家，優勢係涉足政壇多年，人脈深厚，令佢一直躋身中總立法會代表嘅考慮名單之上，佢舊年宣布注資兩億元入股瀕臨倒閉嘅海域化工，易名香港資源，短時間內邀得「四叔」李兆基同華懋支持，準備收購金至尊一役，更加令佢喺商界人氣急升。

除咗方文雄同黃英豪，前行政會議成員廖長城之弟廖長江，亦被視為黑馬人選。有指廖長江係穩陣派，○八年底失驚無神參選港區人大，仲一擊即中，應該係中總刻意培植嘅對象，實力不容輕視咁話。

預定披甲玩直選

對三位熱門人選，我哋打電話請教IQ博士，佢話，中總的確揀緊蟀，不過唔想咁快指名道姓，強調揀人有三大準則：愛國愛港、事業上軌道，可以瞓身議會事務，同埋要有參加直選嘅心理準備，而最後一項條件，對有心上位嘅中總會董挑戰最大。

IQ博士分析，二○二○年立法會隨時行普選，就算保留功能組別，亦都可能唔再由商會協商，而係推舉候選人，再經市民投票選出，喺咁嘅大背景下，三年後嘅立法會中總代表，就要有心理準備，熱身十年，熟習政治，然後喺二○二○年披甲上直選戰場，為中總穩守呢個議席。睇番三位熱門人選，喺商界同專業界都撈得有聲有色，要放低身段玩直選，真係唔易喎！