周縣長如果按照原定計劃上周訪港，就會同代表團會見唔少港府官員，不過好似依家咁剩番下半集，訪港重點就變成喺佢嘅個人畫展上。周縣長習畫九年，無師自通繪出個人色彩，佢今日會為喺藝術中心包氏畫廊舉行嘅個人油畫展剪綵，展出三十幅作品。佢今次訪港帶嚟送畀大家嘅禮物，都離唔開佢嘅畫作。

讚港人「煲冬瓜」

周縣長尋晚出席喺大會堂舉行嘅台北縣敲擊樂團表演，卓妮問佢對香港印象如何，佢話十幾年前曾首次到訪香港，嗰時無幾多個港人識講普通話，只能用英文交談，估唔到時隔十幾年，港人「煲冬瓜」大有進步喎。講起台灣打風情況，周縣長仍然掌握最新資料，佢話台北情況大致良好，只係南部仍有少少問題喎。

周縣長同太太林珊珊尋日中午抵港，會見咗菁英會主席施榮忻、司庫梁宏正及副主席楊華勇，即場亦送咗幅作品畀菁英會做見面禮。施榮忻話，八年前佢加入本港一個名叫「神仙老虎狗」嘅聯誼組織，同一班生肖屬狗或虎嘅台商老友鬼鬼，今次都係因為台商搭路，所以可以咁快見到周縣長。

卓妮