本文重點
金融海嘯令好多香港人身家大縮水，如果唔識得吸取教訓同作出應變，更可能會畀海嘯捲走，從此返唔到上岸，但亦有部分人係變得窮咗之餘，亦同時變得聰明咗，香港「造紙大王」李運強就係一個活生生嘅例子。佢創辦嘅理文造紙，股價喺海嘯期間一度急跌九成半，自己亦因為炒燶Accumulator而勁蝕八億至十億元，好彩佢同間公司都有銘記呢個血的教訓同及時變陣，先至可以劫後重生、轉危為機。
受惠於內地出口持續增長，對包裝紙需求倍數上升，以前專做包裝紙品嘅理文造紙，喺金融海嘯前一度成為當炒股，股價最高見過三十六蚊。但其後海嘯殺到，內地出口及用紙量急速下跌，理文造紙嘅股價亦好似坐跳樓機咁，最低跌至只有一元五毫幾，跌幅超過九成半，令唔少小股東淪為大閘蟹。
蒸發八成半身家
根據《福布斯》雜誌最新公布嘅香港富豪排名榜，理文造紙主席李運強嘅身家亦因為公司股價大跌而蒸發咗接近八成半，由去年排第十四位跌至今年嘅第四十位。事後李運強嘅大仔、理文造紙行政總裁李文俊就同我哋講，好彩佢並冇沾手又名「I kill you later」嘅Accumulator（累計股價期權），否則肯定仲傷。
不過李文俊講嘅其實只係佢自己同公司嘅情況，佢爸爸李運強前日出席仁濟醫院籌款晚會時同我哋講，原來佢本人有炒Accumulator，並因而蝕咗成八億至十億元。佢慨嘆自己做生意幾十年，遇上逆境上落幾千萬可謂司空見慣，但一次過蝕億億聲都係第一次，稱得上係「血的教訓」，自己永遠都唔會忘記！
不過，李運強心有餘悸話，好彩公司喺海嘯後積極轉型，最近生意好番好多，相信最困難嘅時刻已經過去，公司股價近來亦重上番十二蚊嘅水平，令一眾小股東唔使咁傷，佢個心先至安樂番啲！佢二仔理文造紙董事總經理李文斌出席同一場合時亦同我哋講，金融海嘯雖然令內地出口下跌，但同時令佢哋睇到中國嘅內需市場愈嚟愈大，因此公司已即時改變策略，將業務多元化同加強供應內需紙品，做多咗好多書紙同影印紙，所以今次即使稱不上係因禍得福，都總算可以化危為機，重新上路。