立法會議員余若薇（Audrey）在法庭和議會上雄辯滔滔，完全係一個女強人，不過原來女強人都有經不起風浪嘅時候。Audrey上月底到英國參加完二女Cheryl嘅大學畢業禮後，一家五口隨即坐郵輪暢遊波羅的海各國，包括瑞典、俄羅斯、波蘭、德國、丹麥各地，但期間卻遇上驚濤駭浪，嚇到Audrey成晚瞓唔着。
Audrey憶述，當晚風浪大到連船員都話未見過，佢做醫生嘅老公胡健維同三個女經常暈船浪，所以一早食定暈浪丸打底，成晚瞓得好好，反而平時經得起風浪嘅佢，面對驚濤駭浪就嚇到有得震冇得瞓，驚會好似鐵達尼號咁沉船，於是摷醒晒啲女陪佢度過有驚無險嘅一夜。
今次郵輪之旅，Audrey參觀過多國嘅國會制度，驚訝當地嘅議員福利好到無人有，不但議員辦事處夠大，仲提供埋幼稚園畀議員子女入讀，又為議員設立墓園，總之比起香港真係望塵莫及。Audrey話，Cheryl修讀完經濟及數學後，打算會繼續在英國進修，但會先同細妹Jackie回港玩一個月，然後再返英國繼續升學。