Shane尋日同傳媒飯敍，主動報料話自己搬咗去旺角住，理由係貪嗰區夠旺，不過問真啲，原來係何文田加多利山至真，唔係旺角區。話說Shane來港時落腳上等人聚居嘅半山區，其後搬去西貢，可惜住住吓嫌交通唔方便，每次坐小巴出市區，有如亡命飛車。

年前佢索性搬去何文田，去亞皆老街嘅醫管局總部返工近好多。不過Shane以為何文田屬旺角區，經常話畀人知佢係旺角人，最鍾意去旺角捐窿捐罅，行吓金魚街喎。

為了融入香港，近日佢四出物色私人助理。原來Shane嘅廣東話好水皮，所以要搵番個貼身助理做「發聲字典」。咁應徵者要有乜嘢條件呢？Shane話，此人既要熟悉政府及醫管局運作，又要幫佢了解香港文化，依家佢手上收到一百二十封申請信，下星期開始面試揀人，最後由邊位仁兄跑出，大家拭目以待吧！