之不過咁，呢種蜚聲國際其實係比較特別嘅，未必人人都鍾意，除非你唔知個醜字點寫。事緣聯合國將於八月七至十日召開聆訊，審議中國落實《消除一切形式種族歧視國際公約》，香港十二個民間團體組成代表團遠赴日內瓦提出控訴，最主要嘅控訴對象係本港負責執行《種族歧視條例》嘅平等機會委員會，改善人權完全發揮唔到功能。大家都知啦，平機會爛到入心入肺，尤其主席鄧爾邦更加係賴皮天王，立法會議員劉慧卿好扯火咁話：「要去聯合國炮轟佢！」

大家明白未？鄧爾邦衝出香港，進軍國際，將會成為聯合國嘅聲討目標。功夫茶記憶所及，應該從來冇一個香港人咁把炮。有人認為，即使唔可以流芳百世，起碼要做到遺臭萬年，睇嚟，鄧主席好有機會完成遺臭嘅壯舉。

唉，你又好難怪劉慧卿咁激動㗎。前排審計署發表報告，揭發鄧爾邦唔止管理混亂，而且涉及一連串不當行為，包括未經政府批准自把自為購買人壽保險，投保額相等於三年薪金，即係七百萬。審計報告仲踢爆，鄧爾邦去北京出差住嘅係每晚租金二千八百八十元嘅「大使套房」，非常之咁大花筒。其他浪費公帑嘅購物狂行為多到數唔晒。眼見一個咁嘅主席尸位素餐，輿論梗係喝令佢落台啦，點不知，呢條友仔以賴皮口脗否認大花筒，反而自稱周不時都幫政府慳錢。最惡頂嘅係，賴皮天王硬係戀棧權位，即使立法會政府帳目委員會對佢表達「極度遺憾」，佢老哥依然賴死唔走，變相令到平機會自廢武功！

平機會理論上係要為弱勢社群主持公道嘅，可惜吖，正正因為主席失職，弱勢社群有冤無路訴。舉一個例子，融樂會總幹事王惠芬透露，曾經兩次約見鄧爾邦，要求改善少數族裔嘅教育問題，現時大概有一萬個少數族裔人士在學，能夠入讀大學嘅不多於十人，實在少得可憐，你估鄧爾邦有乜反應吖嗱？佢一句「唔得閒」就敷衍了事，拒絕融樂會嘅要求。

話時話，鄧主席又確係忙到一頭煙㗎，成日周遊列國飛來飛去，參加非洲唔知乜嘢芝麻綠豆嘅會議，如果冇得遊埠要留喺香港咩，又要絞盡腦汁利用納稅人嘅血汗錢買呢樣、買嗰樣。人權監察總幹事羅沃啟就講得啱嘞，鄧爾邦只在乎升職加薪，人權工作懶懶閒，簡直阻住地球轉！

計功夫茶話齋，都好嘅，醜事傳出聯合國咯喎，話唔定一物治一物、糯米治木蝨，國際壓力做咗糯米，賴皮天王做咗木蝨，鄧爾邦終於肯知醜落台喇啩！