全國人大暑期山西考察團行程結束，班港區人大返到香港後，爭住分享所見所聞。全國人大常委范徐麗泰話，起初擔心山西煤礦場內沙塵滾滾，臨入場前戴定一雙白手襪保護玉手，誰知煤礦廠鬼咁現代化，挖煤不經人手，全部機械化，於是「白手襪」用唔着，離場時依然係白雪雪喎。
范太日前出席公開活動，講起山西之行顯得眉飛色舞。此行佢參觀咗潞安屯留煤礦及煤基合成油示範廠，坐住防爆汽車實地巡視煤油園區，認真過癮。山西煤礦一直有安全問題，逼到有關單位一定要做啲嘢，近日展開淘汰戰，將原來近萬間大小不一嘅礦場，淘汰到只剩二千六百間，未來會再精選一千間，目的係趕絕渾水摸魚嘅「細場」。
山西煤礦改革成果如何，有待觀察，不過空氣質素已有改善。范太笑言，山西個天以往經常灰蒙蒙，一年只有四十五日見到陽光，依家都唔同晒嘞。
范太此行順便參觀有佛國聖地之稱嘅五台山，入鄉隨俗去五爺廟拜神，得方丈送咗條佛珠畀佢結緣，范太開心到戴喺左手上，唔捨得除。