香港股市升破二萬點後表現反覆，其中關鍵好主要睇今日公布嘅滙控業績。我哋日前撞到外號「白鴿股神」，本身又喺滙豐做嘢嘅前立法會議員單仲偕，自然要問吓佢點睇後市。不過佢就坦言自己只係中低級員工，冇乜滙控嘅內幕消息，又自爆早前佢亦跌眼鏡睇錯市，捉唔到中港股市呢轉強勁升浪，賺少咗好多錢，不過佢都有同大家分享對經濟及股市前景嘅睇法，信唔信就由讀者自行決定喇！
大部分人都認定全球經濟冇可能「Ｖ」形反彈，但對於係「Ｌ」形徘徊谷底，定「Ｗ」形大上大落就意見紛紜。
雞就話佢比較相信一位美國朋友嘅分析，認為今次復甦會係「Nike」型，即好似個剔號咁跌得快、升得慢，有排先至旺番，因此佢認為港股最近升破二萬點，已經係升咗過龍。
雞反而睇好美國同台灣股市，認為前者反彈速度比中港慢，應該仲有得升，後者就純粹係炒政治市，睇死大陸會出手撐台股。佢又話嚟緊暑假會一家四口坐郵輪暢遊加勒比海，然後留低兩個仔喺美國讀書，兩公婆返香港再搏殺過。