原來唔止升斗市民留意冬蟲草有假藥，兩位名醫聚埋一齊食飯都有傾到冬蟲草。金刀梁話佢以前都有食冬蟲草嘅習慣，但近年炒得太貴，都已經冇食。本身係世界家庭醫學會亞太區主席嘅馬會大董李國棟就話，暫時仲未有文獻證明冬蟲草嘅藥用價值有幾高，所以如果冬蟲草有假嘢，索性乜嘢藥材都唔使食，因為保持均衡飲食先係最重要。

港區人大代表馬豪輝同太太早兩晚出席一個晚宴，親身證明咗令佢哋健康嘅唔係冬蟲草，而係控制飲食。馬太話，以前成家人都有食冬蟲草，周不時用六、七條嚟燉湯，不過近年已經食少咗好多，因為一家人嘅飲食習慣改變咗，依家食嘢會盡量清淡啲，所以就連補品都可以食少啲喎。馬律師近來因為控制飲食，成功減咗三十幾磅，原來就係控制飲食有功。不過如果崇尚清淡飲食，以馬太咁識煮餸，咪嘥晒！