今個禮拜三就播最後一集嘅《大咕窿》，係喺一塊約高兩米、闊四米、厚廿五厘米嘅巨型發泡膠上面，挖人形咕窿，玩法係喺限時之內，玩家成功「捐」過迎面飛埋嚟嘅發泡膠上嘅咕窿就得分。無記之前安排一星期一集，收視唔錯就搞到一至五晚晚播。環保組織地球之友六月底陸續收到市民投訴，指個節目好唔環保，原本諗住約埋幾間傳媒，古仔明日至見報，殊不知畀另一個組織環保觸覺搞亂陣腳，咁啱又想講同一個議題。

面對夾擊，無記解畫話節目形式是購自海外製作公司，其中一條款規定《大咕窿》使用的道具板必須以發泡膠製作，確保參賽者安全及遊戲效果。但明白到環保及善用資源的重要，所以使用過嘅發泡膠會重用、重用再重用，製作成假山石雕及雪粒等。

不過，地球之友高級環境事務主任歐詠芷話，《大咕窿》只係電視台唔環保嘅冰山一角，以廿三集，每集用六塊發泡膠推算，已經耗掉二百七十六立方米發泡膠，體積等如兩架雙層巴士咁大，無綫一年咁多製作，數埋數埋都唔知點計。更甚者，發泡膠點重用都好，變咗雪花粒已不能再重用，但鮮有見無綫提及有回收渠道，地球之友係本港唯一有提供發泡膠回收的機構，收番嚟可以再造成籬笆、相架等，但都從來未見過無記送來發泡膠。

《美女廚房》《獎門人》也捱轟

環保觸覺尋日亦加多一腳，發稿話《大咕窿》一晚已經用咗等同四萬二千個飯盒體積嘅發泡膠，個會上周五喺Facebook發起「反對無綫假環保，要求停播大咕窿」嘅群組，短短兩日已有六百人加入。

佢哋仲嫌唔夠皮，鬧埋高收視節目《美女廚房》同《獎門人》，前者就衰虐待動物，令動物死前驚惶至極點，繼而痛若無比地死去，後者則浪費忌廉及亂拋食物，完全係「冇衣食」！