立法會議員唔少係專業人士，有啲挾議員名氣，業務蒸蒸日上，相得益彰，不過，亦有啲面對魚與熊掌，無法兼得，好似「五散人」之一嘅保險界陳健波，由於時間唔夠用，選擇由九月起放棄慕尼黑再保險香港分公司行政總裁份工，轉任顧問，人工少一截。陳健波剖白心迹，唔做ＣＥＯ，心裏最掙扎嘅唔係人工，而係唔捨得艘ＣＥＯ遊艇。
唔捨得公司遊艇
陳健波尋日相約記者遊船河，見證佢嘅後ＣＥＯ生活。陳健波○五年前開始為依家間公司打工，香港支部最大係佢，薪高糧準唔在講，福利更加唔錯，仲提供司機同遊艇，可以隨時相約家人朋友出海。卓妮尋日上船玩咗個上晝，架遊艇雖然唔算好豪華，但係勝在充滿德國風情，古色古香，別有情調，難怪陳健波咁唔捨得。
陳健波話，公司同新任ＣＥＯ都好有人情味，表明只要係為公務，好似邀請業界、議員或者傳媒上船，佢開到聲，一樣借出遊艇。咦，陳健波日後如果對遊艇發相思之苦，不妨約卓妮遊船河吖。
信錯港教育制度
預科畢業後不斷以半工讀形式考取保險專業資格嘅陳健波，育有兩兒，大仔本來無乜心機讀書，會考成績唔理想，去咗美國西雅圖讀書之後，成績突飛猛進，脫胎換骨。陳健波慨嘆，一直信錯香港嘅教育制度，時下青少年濫藥、愛G模，睇嚟並非偶然，加上在職貧窮嚴重，基層向上流動階梯愈嚟愈窄，所以，佢同立法會「五散人」其餘四人，即係會計界陳茂波、「怪醫」梁家騮、廠商會代表林大輝同「I.T.豪」譚偉豪，喺十月復會之後就會傾分工，關注基層問題，好似最低工資同全民退休保障計劃咁，同泛民有合作空間。陳健波對議員份工咁大興趣，唔辭ＣＥＯ點得呀！
卓妮