先旨聲明，功夫茶冇醉酒鬧事，更加唔會去馬來西亞飲酒，事關當地宗教法庭啱啱判咗一個新加坡籍模特兒「飲啤酒罪名成立」，判處六鞭笞刑。

呢嗱，就咁，塱原濕地鄰近嘅河上鄉有一塊過萬呎用嚟種菜嘅農田，一夜之間變成垃圾堆填區，上百架泥頭車硬闖私人土地，出出入入傾倒廢物，搞到農田滿目瘡痍，害到菜蔬活埋死光，簡直就係小型版南京大屠殺。

農田主人見到咁慘烈嘅場面，當然係報警啦。哈，死得佢吖，仲話警方保護市民喎，呃人嘅，不但警方闊佬懶理，連環保署、規劃署、地政署全部耍手擰頭話唔關佢哋事。

試問，泥頭車硬闖私人土地傾倒廢物，同強姦有乜分別？硬闖嘅泥頭車上百架咁多，同輪姦有乜分別？政府部門袖手旁觀，同縱容色魔有乜分別？

更加離譜嘅係，有市民跟蹤出入河上鄉農田嘅泥頭車，得出驚人發現，原來泥頭車係去完粉嶺和合石嘅建築署地盤之後，再駛去河上鄉。換言之，廢物涉嫌來自官方工程，非法傾倒泥頭好大可能同政府有關！

問你怕未？功夫茶諗起一啲恐怖電影情節，有人被殺手追斬，走去警署避難，點知一走入去，見到個殺手着住整整齊齊嘅警察制服為人民服務！

講到呢度其實都未到戲肉，以下先至係成個古仔嘅高潮所在。規劃署對河上鄉苦主咁樣講，你好快快趣趣將農田回復原貌喇，即係清晒所有廢物，如果唔係，提出檢控！

唔知大家點睇，功夫茶就覺得呢個政府好野蠻。喂，人哋係苦主，先係受到泥頭蹂躪，繼而受到官僚冷待，做兵嘅唔去捉賊，反而兇神惡煞話要檢控受害者，橫睇掂睇點都唔啱數。

好嘞，等功夫茶再問多一次，強姦當然係犯法啦，被強姦又算唔算犯法呢？睇怕大家唔再以為功夫茶飲醉酒喇啩。泥頭強姦農田，蠻官加害苦主，咁荒謬絕倫嘅事情居然會發生喺自稱有法治優勢嘅香港，你都咪話馬來西亞判罰飲酒模特兒打藤係難以想像呀，香港嘅野蠻官僚隨時一樣做得出。

話時話，蠻不講理嘅規劃署除咗識得加害苦主之外，原來仲識得搞爛Gag。佢哋好涼薄咁講，以後唔好再隨隨便便畀泥頭車自出自入喇。按照呢班官老爺嘅邏輯，強姦案受害者全部咎由自取，鬼叫你隨隨便便畀色魔埋身咩！所以，唔捉色魔，淨係罰你！

既然係咁，功夫茶建議搵人出動泥頭車硬闖禮賓府，出出入入傾倒大量廢物，活埋錦鯉池，然後狠狠重罰府主兼苦主曾蔭權！