立法會工商事務委員會尋日舉行今個立法年度最後一次會議，霍震霆喺呢個委員會嘅出席率得百分之十二，係咁多個委員之中最低嘅一個，佢尋日罕有地現身會議，結果搞到同事見到佢出席會議都覺得好驚訝。委員會主席方剛一見到佢，就笑住問坐喺隔籬嘅副主席象哥黃定光：「今日乜嘢事？」象哥都忍唔住揶揄：「阿Tim少（霍震霆英文名叫Timothy）真係好頭好尾。」但霍震霆一於懶理同事嘅冷嘲熱諷，只係埋頭細閱開會嘅文件。

不過，霍震霆喺會議開始咗十分鐘都唔夠，就離開會議室聽電話，我哋見佢枱面嘅文件都冇攞走，原本以為佢好快就會返嚟，點知兩個多鐘頭嘅會議結束，都冇再見過霍震霆嘅身影，反而佢嘅助手就聽足全程。