冇事冇幹，因乜事會突然間情緒失控成咁呢？原來據講呢名男子前晚已經因為情緒不穩送院，觀察幾個鐘之後獲安排出院返屋企。本來都好地地，懷疑因為被附近消防車警號滋擾先至病發，卒之釀成倫常慘案，橫睇掂睇，今次係名副其實一單悲劇。

消防車警號有幾滋擾，相信好多人都感同身受。依家唔少消防局離民居好近，一出車就嘈到幾遠都聽到，尤其係深夜，更加令人膽戰心驚。係，消防車響警號唔係唔得，因為滅火救人呢家嘢爭分奪秒，喺繁忙嘅上班時間，馬路插針都唔入嘅時候，開住警號提醒其他駕駛人士讓路，完全係合情合理。

不過，如果消防車係又響，唔係又響，咁就值得商榷喇。以今次事件為例，嗰陣時係清晨時分，天蒙蒙光，成條街只得小貓三幾隻，馬路上更加車都唔多架，根本冇乜嘢阻住消防車去路，使唔使將個警號開到鬼殺咁嘈呀？試想想，一日廿四小時無分日夜係咁失驚無神大響警號，長期咁疲勞轟炸法，莫講話有病嘅人頂唔順啦，就算好人好姐，冇病都嚇到有病呀。

消防處話喎，消防車出入局一定要響號通知路經車輛，但係深夜會酌情改用閃燈或者降低響聲。既然係可以酌情，又可以用閃燈，點解仲要響到拆天呢？唔通車上嘅消防員已經畀警號嘈到變晒撞聾，聽唔出係幾咁大聲？

事實上，有大量醫學研究指出，噪音對人體健康有相當大嘅影響，唔單止會令人煩躁不安、精神緊張，仲會令血壓上升以及增加患上冠心病嘅風險添。

唔係嚇大家呀，有專家甚至指出，由於噪音污染問題愈來愈嚴重，對人體健康嘅影響，同吸煙以及酗酒差唔多㗎咋。話唔定有日，要喺消防車嘅警號旁貼番張警告標語，上面寫住「噪音可引致陽痿」呀！

話時話，噪音污染問題絕對唔係講玩，當局為管制各類環境噪音，制訂咗《噪音管制條例》，清楚列明喺公眾假期及晚上十一時至翌晨七時，如果有人發出滋擾性嘅噪音，可以報警求助。問題係，如果隔籬間消防局半夜三更警號響個唔停，擾人清夢，唔知係咪可以報警處理呢？

講到尾，功夫茶唔係話消防車響號唔啱，不過唔好咁墨守成規，一成不變。電視台喺深夜時分都有個溫馨提示：「現在已經夜深，請將電視機音量收細」，目的就係希望市民夜麻麻睇電視之餘，要顧及其他人嘅感受，閂細啲音量唔好嘈住左鄰右里。

你知啦，香港地小人多，生活壓力已經夠晒大，日日由朝做到晚，唔該有關當局檢討一下，警號應響就響，唔應該響就千祈咪嘈喧巴閉，當做吓好心，等小市民有覺好瞓啦！