校園吸毒成為全城熱話，唔少人對某啲青少年唔識自愛覺得好心痛。有「神奇小子」之稱嘅殘奧田徑金牌得主蘇樺偉尋日被委任做紅十字之友大使，除咗身體力行做義工之外，佢仲勉勵青少年凡事要向好嗰方面諗，千祈唔好咁易就放棄！
偉仔患有先天痙攣同弱聽，但身體殘缺並無令佢感到自卑。喺中學時代，學校嘅老師發現佢嘅田徑天分，推薦偉仔入傷殘人士體育協會受訓，但係長期嘅訓練令佢腰部肌肉受傷，有次甚至喺着襪嘅時候痛到起唔到身。但係偉仔並無因呢啲挫折而放棄，仲喺上年北京殘奧破咗自己保持嘅二百米短跑世界紀錄添！
堅強嘅佢反而慨嘆依家嘅青少年，因為一時睇唔開，就以吸毒嘅方法逃避問題。偉仔話希望青少年遇挫折都要堅強面對，凡事以開心、正面嘅心情處理，千祈唔好成日諗埋一邊喎！