民政事務局副局長許曉暉（Florence）尋日出席一個故事創作頒獎典禮時，即場講古仔畀一班得獎嘅學生聽；只見在場嘅小朋友都十分投入，一睇就知Florence講慣古仔，原來佢已經熟能生巧，只係依家因為工作太忙，每晚返到屋企啲女已經瞓咗，親子時間少咗好多。為咗維持同囡囡嘅感情，Florence就寧願瞓少啲，特登早啲起身同個女Serene講古仔。
原來今年四歲嘅Serene好有要求，不時都會出指定題目考考媽咪。到底係咩題目呢？就係Serene最鍾意嘅Thomas火車！Florence話個女成日都會即時畀個火車名同個地名佢，就要佢即時作個古仔出嚟喎！至於佢有無畀個女考起呢？Florence就只係以微笑作答，大家自然心中有數啦。
下個禮拜就係書展，唔知Florence會唔會帶囡囡去呢？佢話年年都有去開，今年都唔例外；仲話只要個Serene鍾意，仲會買幾本書送畀佢添！