立法會議員同記者平時交手嘅地方，多數都喺立法會大樓，尋日就移師咗去足球場。立法會足球隊尋日大戰傳媒隊，唔少議員都有落場踢番兩腳，可惜天公不作美，開波前天文台已掛起三號風球，天色時晴時陰，一開波仲開始落大雨。場雨只係落咗一陣，當幫大家降降溫，不過大家變晒落湯雞。
平時立法會隊都會搵外援幫拖，尋日一樣唔例外，幾個由立法會隊隊長林大輝搵番嚟嘅現役甲組球員，實力不容小覷。開波無耐，傳媒隊就一直畀立法會隊㩒住嚟打，講到尾都係因為有幾個打後衞嘅外援撐住，經過一輪苦戰，傳媒隊嘅體力好似唔係好掂，走唔出自己嗰半邊場，不過立法會隊點攻都好，最後都無功而回。
到下半場開波無耐，立法會隊外援喺龍門前一輪進攻後，終於把握到射門機會一射入網，賽果一直維持到完場。身為立法會隊領隊嘅譚偉豪賽後話，最初以為傳媒隊由下半場開始會體力不繼，點知下半場嘅走動反而愈來愈多，仲有幾次差啲入到波添；I.T.豪又謙稱，佢哋之所以贏，都係有賴幾位外援喎。
踢完場波之後個個都散晒咁滯，大輝同I.T.豪夾份掏荷包請兩隊隊員醫肚，大家聚餐聯誼一番。