膠袋稅徵費已經實施，政界名人個個都話響應用環保袋購物，總有一兩個袋住傍身。工聯會王國興話，佢身上嘅環保袋已經用咗一年，聽落好環保，但工程界何鍾泰仲環保，話如果啲膠袋或紙袋用爛咗，會用膠紙黐番好再用過。不過，無論佢哋點環保，都唔及行政會議召集人梁振英（CY），CY環保到得人驚，究竟有幾環保呢？
攞走酒店牙膏拖鞋
卓妮早兩日喺中環又見到CY，講起膠袋稅，佢話自己同家人一向都有用環保袋購物，好有環保意識，每逢去旅行或公幹，在酒店用剩嘅牙膏和優質拖鞋，都會攞走帶返屋企物盡其用，所以長期唔使買牙膏，為環保唔怕畀人笑佢喎！CY仲話，屋企只有兩、三套深色西裝，一年四季輪住着，夏天着深色，唔怕見汗漬；冬天着深色，可以吸熱暖一啲，平均每套着三年，一定着到舊才換新衫。CY環保成咁，難度好高，睇怕唔係好多人做得到！
何鍾泰膠紙補膠袋
同樣講環保嘅何鍾泰話，佢儲埋一大箱膠袋放在立法會儲物櫃內，好似政府宣傳片口號「重用再重用」，就算用到袋穿窿，都用膠紙黐番好再重用喎。議員陳克勤亦都話，其座駕長期放定一至兩個環保袋，褲袋又袋住女友送贈嘅小型環保袋，總之有備無患。
不過，克勤仔坦言，佢同好多男人一樣，都唔鍾意拿住一袋二袋嘢周街行，可能怕肉酸難睇啩！市區重建局主席張震遠就係克勤仔口中嗰類男人，事關佢話好少拿住一袋二袋嘢行街，家居一切大小事務都交由太太主理，唔使佢操勞；就算要買書籍，都會選擇網上購物，送貨上門連環保袋都慳番。
對於膠袋稅徵費，會計界陳茂波就話好唔習慣，因為佢一向無帶備環保袋嘅習慣，但為咗環保唔攞膠袋，惟有用雙手捧住啲貨品返屋企，總之各師各法喺喇！
卓妮