有幾唔安全呢？一來係蔓延全球嘅豬流感啦，放假去旅行咩，分分鐘一落機即刻要捉去隔離，返到香港又係要隔離；二來咯喎，似乎到處都動盪不安，有港人後花園之稱嘅泰國唔在講，家陣輪到內地新疆亂七八糟。

新疆首府烏魯木齊發生嚴重暴亂，死咗百幾人，傷者不計其數，汽車、商店、房屋火光熊熊。然後，新疆另一個大城市喀什又有人聚眾示威，難保星星之火唔會燒開去。詳細情況好難掌握，之不過咁，無論真相如何，客觀嘅事實係，新疆忽然之間變得好唔安全。

不幸之中嘅大幸係暫時未見有香港旅行團喺新疆出事，旅遊業議會表示，會向國家旅遊局了解當地局勢。

好嘞，既然新疆暴亂，而且死傷枕藉，香港保安局係咪應該發出「外遊警示」呢？係咪應該呼籲港人唔好以身犯險呢？特區政府尋日係就係發咗一份聲明，不過語焉不詳，功夫茶睇完都唔知佢想點。

不如原汁原味引述一下：「特區政府保安局及駐北京辦事處正密切注意新疆烏魯木齊的情況。據我們了解，現時在當地的港人旅行團已因應情況調整行程，避開受影響的地點。保安局亦提醒身在當地的港人，應注意人身安全。」

喂，上次泰國有事，保安局都識得「強烈呼籲」港人唔好過去玩啦，今次新疆有事，點解完全冇警示字眼？買咗機票嘅市民到底去定唔去好？旅行團應唔應該如期出發？

上次泰國曼谷機場由於受到示威者佔領而癱瘓，大量港人滯留，保安局遲遲冇營救行動，徹底暴露成個旅遊忠告制度廢過廢柴。正正因為咁樣，所以保安局建議推出類似暴雨警告嘅三色外遊警示制度，由低至高發出黃、紅、黑三色外遊警示，如果發出最高級嘅黑色警示，代表相關地區有嚴重威脅，市民唔應該去，旅行團亦要取消。

弊則弊在，特區政府出晒名議而不決、決而不行，呢個三色警示制度仍然處於商討、商討再商討嘅籌備階段，最快都要今年九月先至可以實行。到時咯喎，功夫茶敢大膽講一句，新疆暴亂一早平息咗。

話時話，香港官僚係咪唔敢「以下犯上」呢？你知啦，如果特區政府對新疆發出外遊警示，阿爺都幾冇面㗎，正如不久之前澳洲發出旅遊忠告，話香港空氣污染惡劣到有害健康，特區政府當堂瘀到爆。

唉，講真，即使唔計新疆呢一壇，九月先至有三色外遊警示制度，其實真係好鬼遲。暑假係旅遊旺季吖嘛，九月都開學啦，假設八月泰國再有示威者佔領曼谷機場，點算好呢？係咪又全無警示呢？係咪又唔派包機去救人呢？係咪又任得港人好似盲頭烏蠅咁撲來撲去，最終撞車死亡呢？

計功夫茶話齋，特區政府嘅施政表現餐餐都咁令人失望，不如咁咯，整番個「管治危機三色警示」。黃色警示代表有威脅迹象，高官應該提高警惕；紅色警示代表有明顯威脅，高官應調整政策，如非必要應避免前往示威區；如果發出黑色警示，代表有嚴重威脅，高官不但唔應該去示威區，更應該鞠躬落台！