近年澳門樓價飆升，市民無力供樓，惟有寄望政府推出多啲公屋。崔世安尋日一早就去咗台山社區中心探訪長者和小童，仲同街坊面談，居民伍瑞蓮就向崔世安訴苦，佢話仔女已經到咗適婚年齡，但因為冇錢供樓，被迫擱置成家立室嘅計劃：「要佢地揹住供樓負擔廿幾三十年？我做母親嘅真係好心痛！」

崔世安即時安慰伍女士：「作為父母，唔使畀咁大壓力自己。後生仔肯讀書，肯對父母好，已經證明你教育得好成功。」佢解釋，政府現正修改公屋法例，以致推出公屋嘅進度緩慢，不過佢就承諾等新建公屋落成後，會就各階層嘅意見，安排輪候上樓事宜，而且會特別重視單親家庭所面對嘅住屋問題。