商務及經濟發展局局長劉吳惠蘭（Rita）上個星期二先至公布政府再注資迪士尼嘅決定，十日後就要求財委會撥款，本身已經畀議員批評係開快車。尋日立法會經濟事務委員會主席林健鋒（Jeffrey）仲知會議員，話要喺星期五朝早召開緊急會議，等政府有機會提供補充資料，游說議員喺下午舉行嘅財委會投票支持迪士尼撥款。
有議員批評呢個上午睇資料、下午就投票嘅安排，絕對係立法會前所未有，簡直可以用開過山車嚟形容，炮轟Rita 同Jeffrey離晒大譜，尤其Jeffrey之前已經為咗幫Rita同迪士尼硬闖立法會，爆出用「神秘議案」通知議員開會嘅鬧劇，又涉嫌喺開會期間借故硬銷自己公司生產嘅變形金剛玩具，令其他議員火上加油。
其實至今只有部分泛民主派可能會反對迪士尼撥款，政府理應夠票通過，點解Rita需要咁緊張呢？原來第一大親政府黨民建聯，一早預咗喺當日下午舉行創黨十七周年酒會，仲搵咗煲呔曾主禮，一眾民建聯議員自然要畀面出席，間接令到Rita喺財委會唔見咗幾張鐵票，佢惟有死死地氣向議員提供多啲資料，希望可以藉此箍多一兩張支持票。