勞工界立法會議員李鳳英早前喺立法會大樓跌親，搞到盆骨移位，瞓醫院瞓咗一大輪，唔知喺咪因為有切膚之痛，尋日無端端出席自己冇份嘅立法會保安事務委員會，批評保安局搞白車三級制，話報案者要答一大堆問題，先至可以叫到白車，有冇搞錯！
李鳳英尋日喺會上，一談到呢個白車三級制，就火都嚟埋，仲講到自己嘅切身經歷：「你哋有冇人叫過白車呀？我就叫過，我傷咗報警，兩三句已經有人叫我開定門。三級制叫白車，要人答九條問題，答得嚟都斷咗氣，點可以咁樣做……」佢意猶未盡繼續鬧：「如果答答吓，嗰個人暈咗點算？」咁又講得有道理喎，莫非消防處唔知？
李鳳英愈講愈激氣，大大聲連珠炮轟之餘，又話自己好關心救護車服務質素，搞到保安局嘅代表呆咗好耐先識應佢，然後不斷解畫，話報案人答完頭三、四題已經知道情況分到級，可以派車，唔使搞到第九條先出車；又話如果有懷疑，會立即派車。若然係咁，點解又要搞九條問題嘅機制出嚟呢？