香港發展論壇尋日搞咗個研討會，搵咗唔同界別嘅人士討論香港喺中國崛起下嘅角色，政界唔少人畀面發起人陳啟宗都踴躍出席，疑似特首參選人、行政會議召集人CY梁振英就再次借機會表明心迹，話過去廿年來，都有人就佢係唔係參選特首「畀意見」，至於是否成事，佢照例賣下關子「遲啲再講」。
尋日到場嘅包括全國人大基本法委員會副主任梁愛詩、全國政協常委陳永棋及楊孫西、港區人大代表羅范椒芬等，多到數都數唔晒。
但CY繼續成為新聞焦點。被問到最近有無多咗人就佢參選一事畀意見，CY一貫自信咁笑住答：「過去二十年都成日有人畀意見我㗎啦！」原來廿年嚟都有人就佢參選特首畀意見，即係始自一九八九年，大家聽清楚未？考慮咗成廿年，睇怕都快有決定啦係嘛。