卓妮見到靚衫眼前一亮，捉住在場嘉賓交換着衫心得。方剛係時裝品牌Jessica及Episode老闆，睇騷表情分外肉緊，見佢金睛火眼實每件新衫，又不時同身邊嘅太太交頭接耳，唔知係咪趁機偷師呢？方太扮靚功架都唔弱，以斑馬紋衫襯同款花紋高跟鞋，簡單中見心思。

貿發局請嚟十位時裝設計師展示春夏系列新裝，江素惠同囡囡白心怡（前排左三、左四）都畀面捧場。	○一年江素惠（右）離開光華新聞文化中心嘅告別騷，白心怡都有現身撐媽咪。（資料圖片）	尋日展出嘅作品不乏大膽創新嘅元素，呢條裙恐怕未必人人夠膽着出街。 （胡耀威攝）

充滿驚喜但太超現實

場騷似乎令方剛相當滿意，大讚「本地薑」夠辣，設計充滿驚喜，不過方剛嫌啲衫嘅款式太超現實，着唔到出街喎。不過佢不忘為本地設計師爭取權益，話政府應該投放多啲資源協助本港設計精英打入國際舞台，香港時裝業至有前景。

方剛講起時裝頭頭是道，但一提起行Catwalk就耍手擰頭。卓妮問佢有冇試過粉墨登場行騷，方剛即時瞪大眼話：「邊度得呀！如果卓妮你肯行，我就行囉！」方剛真係謙，查實佢天生模特兒骨架，身形高大威猛，絕對唔輸蝕畀啲後生仔，唔行Catwalk，真係晒料！

江素惠囡囡係圈中人

同場嘅江素惠就進取好多，佢尋日悉心打扮，手挽名牌最新款嘅Chanel手袋到場，擺明要同台上模特兒爭妍鬥麗一番。江小姐謙稱個手袋係細女白心怡由美國帶畀佢嘅最新禮物，唔係有心晒命。尋日佢專登帶埋囡囡睇騷，等女兒見識吓。

心怡係中美混血兒，外形鬼鬼哋，原來佢係時裝圈中人，喺紐約負責統籌時裝騷及時裝廣告，扮靚觸覺夠晒敏銳。江小姐愛女心切，正努力游說女兒返香港發展，話前景一定比留喺美國好喎，話晒江小姐喺中港台三地人脈廣闊，心怡返香港發展，點計都着數好多喇！

卓妮