加價消息劣評如潮，盛智文事後補鑊解釋話，加價係為咗償還擴建嘅貸款。不過田少就覺得盛智文嘅解釋太牽強，佢話海洋公園動用五十五億元增加樂園設施，但當中一半由政府畀，四分之一喺儲備度攞出嚟，只有四分之一要問銀行借，所以實質要還嘅錢唔多，佢仲話：「四月開嘅亞洲動物天地奇珍異獸都係中央送，都唔使錢買……啲設施起好晒，擺多啲嘢畀人玩，你到時先加價，人哋條氣都順啲吖，董事局應該解釋加價嘅理由！」

田少之後仲以子之矛，攻子之盾，明窒盛智文講一套做一套，未能與香港市民共度時艱。佢狠批海洋公園獅子開大口，話依家失業率不斷上升，遊客數字就係咁跌，海洋公園竟然大幅加價，仲要係加兩成，加幅太大，市民根本無法接受。佢連心嗰句都講埋出嚟：「海洋公園加價冇諮詢過旅發局，我都係睇新聞先知，我都打咗個突。」

杯葛巡遊結怨

旅發局同海洋公園多年嚟合作無間推動業界發展，何解田少今次咁高調批評其加價決定呢？其實雙方嘅心病有迹可尋，記得今年由旅發局主辦嘅新春花車巡遊，海洋公園多年嚟都係主打隊伍，但今年盛智文突然宣布為咗慳錢，唔參加巡遊。外界一直盛傳海洋公園不滿旅發局「大細超」，大灑金錢幫對手迪士尼做宣傳，加上巡遊時安排迪士尼喺一個較佳嘅節目時段播出，所以盛智文以「縮皮」為由杯葛巡遊喎。

旅發局畀盛智文一鋪蹺起，田少谷住呢道氣足足半年，終於出番啖氣。不過，正所謂「冤家宜解不宜結」，旅發局同海洋公園對旅遊業十分重要，如果兩者嘅心病繼續升級，對旅遊業發展點都係弊多於利。