舉個例，特區政府當年咪做過一次敗家蠢仔囉，見到米奇老鼠就投晒降，問都唔問，瞌埋眼同華特迪士尼公司簽咗份不平等條約。最離譜嘅係，人出豉油香港出雞，港府作為大股東，居然無權過問迪士尼樂園嘅管理以及營運，呢啲咪就係喪權辱港囉！

呢嗱，最近港府同華特迪士尼公司達成擴建協議，當局吹到係「雙贏方案」，真係笑大人個口。冇錯，表面睇起上嚟，呢次迪士尼以股本形式注入新資金，政府以債換股，唔使注入額外資金，問題係天下間邊有咁大隻蛤乸隨街跳吖，以債換股其實咪即係意味債務無法收回，同再度注資又有乜分別吖？

喺新協議之下，港府名義上仍係大股東，但股權比例不增反減，依然係冇話事權。喪權辱港不平等條約簽一次已經呻笨，港府簽完再簽，笨完再笨，試問點可以說服到市民、點可以說服到議員呀？

尋日立法會經濟事務委員會舉行特別會議，討論迪士尼樂園擴建計劃，有議員直斥迪士尼一直將營運狀況收收埋埋，長期黑箱作業，得咁少資料就要立法會通過擴建計劃，係咪倉卒咗啲呢？

又難怪班議員扯火喎，政府做咗提款機咁，一次又一次注資，但換嚟嘅唔係一個人人常歡笑嘅樂園，而係一個令香港人眼淚掉嘅爛攤子。議員問幾時賺錢講唔出，幾時派息又講唔出，十問九唔知，喂，做生意邊係咁做㗎？

商務及經濟發展局局長劉吳惠蘭死撐受保密條款限制，唔可以披露包括營業損益嘅敏感商業資料，但迪士尼由○八至○九年開始，會公布每年入場人次及財務表現主要數據，佢話應該可以增加透明度。

唔係啩，迪士尼每年公布入場人次及財務狀況，使唔使好似皇恩浩蕩咁呀又？迪士尼樂園主要係用香港納稅人嘅錢興建，增加透明度根本係天經地義！

唉，依家香港人洗濕咗個頭，都唔知點埋尾好。有議員質問政府有冇考慮過退股，將股份全數賣畀美國迪士尼，唔好再無底深潭咁填落去。

不過唔好妄想嘞，老老實實，香港迪士尼幾時有盈利，只有天知地知，呢個樂園仲有幾多經濟價值，大家心照啦，想人哋接番個冇前途冇希望嘅爛攤子，諗都唔好諗呀！

事實上，樂園開業嗰陣時係威係勢，之但係頭幾年嘅入場人數都唔能夠達標，家陣擴建計劃話就話會有全球獨一無二嘅景點。但問題係香港獨有唔一定係好嘢㗎，樂園豆腐膶咁大，夠係全球獨有咯，咪又係一直拍晒烏蠅冇乜人幫襯。

去過美國迪士尼樂園嘅人都知，人哋個主題公園玩幾日都未玩得完，香港半日就乜都玩晒，再加埋上海迪士尼樂園即將拍板，大過香港多多聲，香港就算擴建完都唔係嗰皮，想話起死回生，有冇咁容易呀？

計功夫茶話齋，香港迪士尼擴建唔擴建，睇怕都係死路一條，香港政府騎虎難下，納稅人焗住做老襯，真係冤哉枉也！