早前我哋問過譚志源係咪真有此事，佢扮嘢話聽唔到；尋日佢出席一個公開場合，被問到同一問題，雖然佢唔回應，但就講多幾句，仲講咗「四盡」添！講乜？佢話自己喺政府做咗二十二年，一直「盡心、盡性、盡意、盡力」，做好自己本分，仲會以謙卑嘅態度服務市民，無論喺任何崗位上，都會本住同一心志同服務態度服務市民喎。

嘩！狂笠自己高帽噃，佢以前做公務員嗰陣，最令人印象深刻係當年佢做前財爺梁錦松嘅新聞秘書，阿松喺預算案公布前夕偷步買咗架車，最後被迫下台，當時已經有人問：點解譚志源喺政府工作咗咁多年，都唔識提醒吓佢？有人批評佢有失職之嫌，甚至有更多嘅聯想添。

究竟點解譚志源可以升得咁快，只有佢自己同埋任用佢嘅煲呔曾最清楚。刻下大家唯一可以睇到嘅係，如果譚志源可以上位嘅話，佢月薪將由依家嘅近二十萬元加多四成，咁除咗佢口中嘅四個盡之外，可以加多一個就係「加到盡」！