前旅遊界立法會議員楊孝華（Howard）告別政壇後，同囝囝分道揚鑣發展，細仔楊哲安（Jeremy）繼承其衣鉢，加入官場做教育局局長政治助理，Jeremy爆料話，爸爸重返澳洲校園讀旅遊學碩士寶刀未老，話咁快年底就畢業，屆時輪到佢買定禮物，賀爸爸戴四方帽。
早幾日下午行經立法會門外，見到Jeremy迎面而來，佢主動透露暑假會去澳洲探爸爸，只有幾個月大嘅ＢＢ女亦會同行，事關自從爸爸去年十月與媽咪去澳洲進修後，一家人分隔異地，惟有趁暑假至可以聚一聚。Howard退休讀書成為佳話，雖然佢已榮升為爺爺級人馬，但仍然堅持去澳洲嘅大學讀風流書，該校環境優美喺正黃金海岸附近，放學行吓沙灘、打吓高爾夫球，歎過做皇帝。又係嘅，Howard捱咗大半世，係時候享吓仔福囉。
講開暑假外遊探親，立法會議員張文光都話要去英國探望喺嗰度讀緊大學嘅女兒。張文光雖然未倣效Howard咁重返校園進修，但熱愛睇書習慣多年未變，見到我哋仲主動介紹手上本新書，書名叫《晚年鄧小平》，係由日本學者撰寫。張文光話，睇得多偉人傳記，轉數都會快好多喎。