奧運金牌運動員風光背後歷盡辛酸，多年來嚴格特訓造成骨骼和肌肉勞損，傷患影響比賽之餘，退役後亦長期承受舊傷患煎熬，前中國體操王子李寧最近就因為舊患要入院做手術。聽聞李寧因為脊椎骨刺增生，在北京一間醫院做切除手術，現已出院返回北京家中休養，康復進度良好。
據聞李寧脊椎骨刺增生，係因為多年來在國家體操隊特訓造成嘅腰脊舊患再次過度勞損，亦有傳話可能係去年籌備奧運開幕式「飛天」燃點火炬，成個月在鳥巢「吊威吔」操練凌空走路及點火，令年紀有番咁上下嘅李寧腰背肌肉、韌帶及骨骼過度損耗，但呢個傳聞仍有待證實。
醉心中國剪紙藝術嘅王迦南上月發布新書《紙隙尋夢》，佢話原本邀請好朋友李寧做主禮嘉賓，但就遇啱李寧因傷患入院做手術未能出席，於是改為邀請港大副校長李焯芬主禮。作為「李寧有限公司」非執董嘅觀塘區議會主席陳振彬，都有慰問李寧，佢話專業運動員有舊傷患好常見，好小事啫。