周一鬧到周末

首先打響頭炮嘅係鬍鬚曾，佢星期一朝早將出席立法會財經事務委員會，交代香港最新經濟情況。議員除咗準備插佢紓解民困同振興經濟不力之外，仲會繼續追問佢逼走金管局總裁任志剛同欽點特首辦主任陳德霖接任嘅醜聞。任佢啲太極功夫點樣犀利，都好難全身而退。

星期二嘅戲匭更精彩，有休會前最後一次答問大會，泛民肯定會質詢煲呔曾點樣回應數以萬計市民七一上街提出嘅訴求，包括「倒曾」口號。加上煲呔曾最近兩次出席答問大會都言語失禁，前一次涉嫌爆粗話唔同議員「狗噏」，上次更加爆出「六四代表論」風波，最後搞到要公開道歉。泛民食過翻尋味，唔知又有乜招數？

星期三朝早會召開休會前最後一次立法會大會，打頭陣有政府帳目委員會嘅平機會報告，平機會主席鄧爾邦勢必遭到狠批；之後仲有六條口頭質詢、七項決議案、四項動議同休會辯論等等，保守估計傾足兩日兩夜，若有人玩拉布或者投票甩轆，分分鐘玩到星期五朝早。重頭戲係鬍鬚曾嘅兩項政府發債決議案，周一鑊負責嘅養魚海水立法亦有爭議，預計又有一番激辯。

如果星期四嘅立法會大會冇超時，星期五朝早會召開民政事務委員會討論增加賽馬日數。下午就係休會前最後一次財委會，Rita負責嘅「割地賠款式」迪士尼撥款，以及周一鑊負責嘅「趁火打劫式」三億元衞生抗疫撥款，都有唔少議員有意見。為方便同事盡情發揮，財委會主席劉慧卿特別安排兩節共四粒鐘會議，加時上演呢場「立會煞科插人騷」！

到周末仲有一個教育事務委員會特別會議，再次討論正生書院同校園吸毒問題，鬧足六日去到星期日先有得抖吓。最慘係部分委員會七月中下旬仲有會開，個別官員連暑假都要押後啲放。不過講到尾，佢哋每月攞緊納稅人近三十萬元嘅錢，做錯嘢淨係畀議員鬧吓唔使謝罪下台，已經算係寬待了。